Frábært framtak :-)

Kíkið á http://www.hotelflatey.is/, búin að setja það hér til hliðar undir "Hótel Flatey"

Stund milli stríða

Nóg að gera hjá mér eins og sönnum barðstrendingi sæmir

Sýningin "Perlan Vestfirðir" voru í Perlunni fyrstu helgina í maí. Þar komu um 23.000 manns sem er alveg frábært.  Fólk hefur greinilega áhuga á að kynna sér landið.  Mér finnst oft eins og vestfirðir verði útundan þegar fólk er að tala um að ferðast um landið, og kannski eru þeir það, en þetta er með fallegustu stöðum á landinu. Kannski er það út af vegunum sem fólk veigrar sér við að fara vestfjarðahringinn, kannski er það bara auðveldara og þægilegra að keyra norður á Akureyri og heim aftur, kannski eru til milljón ástæður fyrir þessu.

Ég er engin undantekning í þessu. Ég hef alltof lítið farið vestar en Bjarkalundur, og alltof lítið vestur að Bjarkalundi, þó á ég ættingja bæði á Reykhólum og vestur á Ísafirði, skamm ég. Ég fór þó vestur í Dýrafjörð eina helgi í fyrra, lenti í besta veðri sem hugsast gat og notaði það til að keyra aðeins um. Fór í fyrsta skipti á Bíldudal, fór inn í Selárdal, í laugina í Reykjafirði, í pottinn í fjörunni við Flókalund og fleira og fleira og þetta var hreint út sagt frábær ferð, þrátt fyrir sprungið dekk og ekki bestu vegi í heimi

Verum dugleg að hvetja fólk til að heimsækja sveitirnar okkar, þó það sé sagt að hverjum þyki sinn fugl fagur, þá fæ ég oft að heyra frá hlutlausum aðilum að sveitin mín sé ein sú fallegasta á landinu, þá verð ég voða voða voða montin og stolt........og skammast mín fyrir að heimsækja hana ekki oftar.

Hafið það gott

kveðjur í bili

Hanna Dalkvist 

...sól í heiði skín

Það var fundur hjá okkur í stjórninni á miðvikudagskvöldið og kom Ólína þá á sinn fyrsta fund, gaman að fá þig Ólína.  Að sjálfsögðu var aðeins haldið áfram að ræða um kvennadeildina en við sluppum þó við slagsmál, við erum líka svo miklir friðarsinnar við Barðstrendingar

Það var ýmislegt rætt um sumarið og haustið og fengum við Ólína það verkefni að finna hljómsveit á haustballið.  Við stefnum að því að fara í stífar samningaviðræður við Skógarpúkana, því ég veit að þeir myndu algjörlega slá í gegn hjá okkur. Það er nauðsynlegt að fá hljómsveit sem spilar alla tónlist og þeir eru snillingar í því, yrðu trúlega bara æviráðnir eftir ballið. 

Svo var að sjálfsögðu rætt um Heiðmörkina og ferðirnar í sumar.  Ferðin í ágúst gæti orðið mjög spennandi, segi ykkur meira um hana seinna þegar búið verður endanlega að ákveða hvert skuli halda.

Læt þetta duga að sinni, vildi bara aðeins sýna smá lífsmark hér

kveð að sinni

Hanna Dalkvist 

Reykhólar.is

Einar Örn sveitarstjóri Reykhólahrepps var svo almennilegur að setja tengil inn á þessa síðu okkar inn á reykholar.is, svo vonandi fáum við marga gesti, endilega skrifið í gestabókina

Ég er búin að setja vísun hér til hliðar á skemmtilegar síður um Skóga í Þorskafirði og Torfbæinn á Reykhólum.

Í framhaldi af gleðifréttunum um fjölda nýrra félaga, þá er strax kominn einn nýr félagi í viðbót eftir fundinn síðasta miðvikudag, svo kannski verður annað metár hjá okkur.  Austur-Barðstrendingar ætla að hittast í kvöld á "pöbb" í Engihjallanum klukkan 21, (fyrir ofan pizzustaðinn), og væri kannski ráð fyrir mig að fara þangað með blað og penna og skrá fólk í félagið.  Gæti kannski fengið ansi marga eftir miðnættið hehehe

Eins og auglýst var hér, hittust eldri Barðstrendingar í Breiðfirðingabúð í dag. Ég hef ekkert frétt af því ennþá en vonandi var góð mæting eins og alltaf. 

Mig langar þó að skella hér inn smá hugleiðingu.  Af hverju fáum við yngra fólkið ekki að vera með í þessu, þó við þyrftum að borga 1000 kr. inn?  Þyrftum við ekki einmitt að reyna að fá allan aldur með í allt? Ég væri til í að borga mig inn þó eldra fólkið fengi frítt inn. Eins og fram kemur á bloggsíðu hjá Ólínu (dóttur Heiðu), þá er kannski ekkert skrýtið þó komi fáir í ferðina okkar í ágúst.  Eldra fólkið fer í ferð á jónsmessunni og er það vel, og margir láta sér þá ferð duga.  En væri ekki sniðugt að hleypa yngra fólkinu með í þá ferð?

Vona að ég sé ekki að pirra neinn með þessari hugleiðingu, en eins og ég segji, hvar væri þjóðfélagið ef allir væru alltaf sammála?

Kveðja í bili

Hanna Dalkvist 

Auglýsing

Sumarfagnaður

 Kvennadeildar Barðstrendingafélagsins

 

verður haldinn í Breiðfirðingabúð, Faxafeni 14,

laugardaginn 29.apríl 2006

og hefst klukkan 14:00

 

Hlaðborð - skemmtiatriði

og gott tækifæri til að hitta vini og sveitunga.

 

Allir 65 ára og eldri úr Barðastrandasýslu,

 ásamt mökum eða aðstoðarfólki velkomnir!

 

Munið lyftuna við norðurinnganginn.

 

Kvennadeildin 

Aðalfundurinn

Alveg var þetta frábær fundur hjá okkur í kvöld.  Miklar umræður sem spunnust um ýmis málefni og mikið fjör. Hvernig væri líka samfélagið ef allir væru sammála um allt??

Það mættu um 35 manns sem er rosalega gott.  Við hefðum þó viljað sjá fleiri af ykkur nýju félugunum.  Gleðitíðindi kvöldsins eru þau að í félagið voru skráðir 22 nýjir félagar.  Þrjú þeirra mættu og var gaman að sjá þau nýju andlit. 

Svo voru auðvitað veitingarnar þær bestu sem hægt var að hugsa sér

Ég segji ykkur meira af þessu seinna, vildi bara láta ykkur vita að þið sem mættuð ekki, misstuð af góðri skemmtun í frábærum félagsskap.

Góða nótt í bili

bestu kveðjur

Hanna Dalkvist 

Frítt !!!!!

Hæ hæ, bara að minna ykkur á fría og umfram allt gómsæta kaffihlaðborðið í Konnakoti, Hverfisgötu 105, 2.hæð, á miðvikudagskvöldið (eftir tvo daga), klukkan hálf-níu (20:30) og þið fáið frábæran félagsskap og aðalfund Barðstrendingafélagsins í bónus

 Sjáumst öll, hlakka til, hlakka til

kveðja

Hanna Dalkvist 

Þú ert ungur enn ;)

Hahaha já eins og kemur fram í gestabókarskrifunum frá Ólínu, þá erum við fólkið á fertugsaldri og yngra það unga fólk sem ég var að hvetja til að koma á aðalfundinn.  Við erum nú svo ung að annað eins hefur varla sést...........eða þannig.

Ég vil líka taka undir hennar orð, að við skulum fjölmenna á fundinn og sína stjórninni að við séum að meina eitthvað með að vera í félaginu.  Þau eru mjög ánægð með að fá okkur og það er okkar að sjá til þess að félagið lifi um ókomin ár.  Það er líka svo margt sem við þessi ungu getum lært af þeim eldri þó að við séum orðin eldri en þau yngri

Gleðilegt sumar öll

sjáumst hress á miðvikudagskvöld

kveðja

Hanna Dalkvist

P.s. endilega skrifið í gestabókina. 

Ýmislegt smálegt

Það gladdi mitt litla hjarta að fá Sumarliða póst inn um lúguna hjá mér í gær. Að vanda er hann mjög skemmtilegur og ekki við öðru að búast af þessari frábæru ritnefnd sem við höfum

Þar kom meðal annars fram að Aðalheiður Hallgrímsdóttir (Heiða í Mýrartungu) sigraði glæsilega spilavistina í vetur, en spilað var annan hvern laugardag við Borgfirðinga.  Þeir hirtu hins vegar karlaverðlaunin, enda ekki annað réttlátt en að skipta þessu jafnt á milli

Svo vil ég minna ykkur á aðalfundinn í næstu viku. 

Mig langar sérstaklega að hvetja ykkur, sem hafið skráð ykkur í Barðstrendingafélagið síðan í apríl í fyrra, að mæta.  Það hefur fjölgað mjög ungu fólki og það væri enn meira hvetjandi ef við hittumst öll á aðalfundinum og sjáum í raun hvað við erum orðin mörg.  Ef það er hvatning fyrir ykkur þá verða ýmsar kræsilegar veitingar í boði, t.d. brauðtertur, brauðréttir, kleinur, rjómatertur o. fl. o.fl.

Hlakka til að sjá ykkur

Kveðja

Hanna Dalkvist

Tilraun

Til að vekja athygli á Barðstrendingafélaginu, langar mig að gera tilraun með þessa bloggsíðu. 

Hér langar mig að koma öllum tilkynningum, auglýsingum og upplýsingum sem viðkemur Barðstrendingafélaginu.  Ég er svo heppin að vera í varastjórn, þannig að ég get fylgst nokkuð vel með.

Draumurinn er að þetta verði vettvangur fyrir alla Barðstrendinga, hvar sem er á landinu, til að nálgast upplýsingar og viðburði viðkomandi Barðstrendingafélaginu.  Ef þetta gengur vel er aldrei að vita nema við gætum gert alvöru heimasíðu.

Endilega notið þessa síðu líka til að spjalla saman í athugasemdum neðan við bloggin.

 Fyrsta auglýsingin hljóðar svo:

 Aðalfundurinn verður haldinn 26.apríl klukkan 20:30 í Konnakoti 

 Allir að mæta

 kveðja í bili

Hanna Dalkvist