Jólaandi í Vesturbyggð

Frábært framtak hjá unglingunum, kíkið á http://vesturbyggd.is/frettir/Godgerdarvika_i_Vestend

Sjónlínan

Ég keypti mér ný gleraugu um daginn sem ég er voða voða voða ánægð með. En það sem ég er mest ánægð með er þjónustan í gleraugnaversluninni Sjónlínunni á Strandgötunni í Hafnarfirði þar sem ég keypti þau. Þau hafa endalausa þolinmæði fyrir manneskju sem sér fullt af flottum umgjörðum og getur engan vegin ákveðið hvað á að kaupa. Það sem meira er þá eru þau með tæki sem tók mynd af mér á báða vanga og beint fram með mismunandi umgjarðir. Ég gat svo skoðað myndirnar hlið við hlið í tækinu og borið saman umgjarðirnar sem mér leist best á. Þannig náði ég loksins að velja frábæra umgjörð. Svo get ég alltaf farið og látið stilla þau ef þau skekkjast eða hvað sem er. Mæli eindregið með þessari búð, gott andrúmsloft og notalegt að koma þarna inn, ekkert stress og allir í góðu skapi. Endilega kíkið ef þið eruð að hugsa um að fjárfesta í gleraugum, verðið er nefnilega mjög gott líka.

Takk fyrir síðast

Flottur dagur í gær, frábært veður og enn betri jólavaka. Gaman að sjá hvað margir mættu þó ég hefði viljað sjá fleiri af "yngri" kynslóðinni. Annars var nánast fullt hús og rosalega gaman. Ég og Ólína lásum upp úr bókum og svo voru sungin jólalög, drukkið besta heita súkkulaði sem ég hef smakkað og borðaðar smákökur. Ekkert stress og allir afslappaðir sem veitir ekki af svona rétt fyrir jól þegar manni finnst umhverfið gjörsamlega við það að fara á hvolf, allir að flýta sér við að kaupa sem mest.

En takk fyrir samveruna í gær, hlakka til að sjá ykkur öll aftur á næsta ári.

Endilega hafið bak við eyrað að láta okkur vita ef þið heyrið af Barðstrendingi sem ætlar að gefa út bók.

Jólavaka næsta sunnudag

Næsta sunnudag, 9.desember, verður okkar árlega jólavaka í Konnakoti. Við ætlum að byrja klukkan 16:00. Við munum gæða okkur á ljúffengum jólakökum og heitu súkkulaði, hlýða á bráðskemmtilegan upplestur úr bókum og fleira.

Hlakka til að sjá sem flesta, það var vel mætt í fyrra og vonandi verður enn betur mætt núna.

 

Flott síða

 

http://www.alta.is/klettur/ 

Skemmtileg frétt :)

Vissi ekki að Fílapóló væri til...

Hinn eini sanni íslenski fílamaður

Skemmtileg skilaboð til Patreksfirðinga

Það mættu fleiri lífga upp á grámyglu hversdagsins eins og einhver dularfull kærleiksrík manneskja á Patreksfirði, sjáið http://www.patreksfjordur.is/

Þetta er eitt af skilaboðunum: 

Gæt þessa dags

Því gærdagurinn
er draumur
og morgundagurinn
hugboð
sé deginum
í dag vel varið,
mun gærdagurinn
breytast í
verðmæta minningu
og morgundagurinn
í vonarbjarma.

Gæt því vel þessa dags

Mjög áhugavert fyrir okkur að vestan

Kíkið á þetta, ég var fljót að panta mér

http://reykholar.is/?i=11&b=3,996&offset=&offsetplace=&expand=  

Góð saga úr bransanum

Frægt fólk er oft beðið um góða sögu úr bransanum og ég ætla ekki að láta mitt eftir liggja og segja ykkur eina góða sögu úr Bingostjóra-bransanum  Það nefnilega féll einn dýrlegur gullmoli á síðasta bingokvöldi.

Þegar ég las upp tölurnar, gaf ég öllum stöfunum nafn samviskusamlega til að hafa alveg á hreinu hvaða staf ég væri að tala um, stafirnir hétu sem sagt B=Bjarni, I=Ingi, N=Nonni, G=Gunnar, O=Oddur og ég kallaði alltaf "bé tveir, bjarni tveir" svo ekkert færi nú á milli mála.

Eina umferðina spiluðum við plúsinn, þ.e. "N" niður og miðju röðin þversum, en hann Nonni lét heldur betur á sér standa. Tölurnar í Bjarna, Inga, Gunnari og Oddi komu endalaust og einn og einn Nonni inn á milli, svo seint kom bingóið. Mér varð tíðrætt um hvað stæði lengi á Nonna og held að mér hafi tekist að vera smá fyndin stundum. En það var ekki lengi.

Næstu röð á eftir spiluðum við U, það er "B" niður, neðsta röðin þversum og "O" niður, sem sagt teiknuðum U á spjaldið. Þá lét Nonni sko ekki á sér standa heldur kom hver á fætur öðrum þannig allir voru orðnir dauðleiðir á honum Nonna. Þá gall í góðum manni úti í sal: "Þú þarft nú ekki að misnota hann Nonna þó það hafi staðið á honum áðan".

Eigið góða helgi

Vísurnar hennar Bjargeyjar Arnórsdóttur

Þeir sem mættu á Hagyrðingakvöldið muna sennilega eftir því að af þeim sex hagyrðingum sem voru á staðnum, var aðeins einn karlmaður. Að auki fengum við svo sendar vísur frá tveimur karlmönnum.

Badda er vön svona hagyrðinga-uppákomum og oft verið eina konan við borðið en varð á orði þegar hún sá þátttakendur kvöldsins:

Með körlum oftast er ég ein

við yrkinganna borðin.

Nú sé ég Hjört á sömu grein

sá má vanda orðin.

 

Eurovision:

Finnland stóri staðurinn

stolt með keppni sína.

Makkarauði maðurinn

mun þar bjartast skína.

 

Vegagerð:

Sældin hvíld á því öll

að aka vítt um láðið,

ótal vegir undir fjöll

er því besta ráðið.

 

En Vestfirðirnir vita menn

virkjað augun geta,

og fegurðina flestir enn

framar öðru meta.

 

Átthagarnir:

Um átthagana oft ég kveð

eins og dæmin sýna.

Á þá besta máta með

megi sólin skína.

 

Burður:

Gott er sínar gersemar

að geta borið keikur

fjarri mörkum fátæktar

og finnast ævin leikur.

 

En betra andans aðalsmark

alltaf með sér bera,

geta þolað heimsins hark

hlýtt úr köldu gera.

 

Kosningar:

Blásið í lúðra á fjögra ára fresti

fæst ekki í hryðjunum uppstytta nein,

kallað til funda að kaftala gesti

kosningaloforð er íþróttagrein.

 

Um efndirnar þýðir nú ekki að tala

því ýmislegt getur þær truflað og skemmt

ef hópa af gæðingum hægt er að ala

finnst heimskum að tilveran gæti vel stemmt.

 

Kosninganna kraftur er

kjörið tækifæri

í áframhald að efna sér

sem eitthvað betra væri.

 

Vorið:

Gáska lífsins glöggt ég skil

gælir sól við stráin.

Vaknar sterk í vorsins yl

vængjatakaþráin.

 

Kinnastaðaá 1. apríl:

Áin rennur, af sér spennir fjötra,

það er sól og það er vor

þeysöm gjóla hvetur spor.

 

Vornótt undir Vaðalfjöllum:

Birtan er á bak við fjöllin

blundar allt um næturstund,

konungleg er klettahöllin

kyrrðin vefur mel og grund.