Vísurnar hennar Magdalenu Thoroddsen

 

Kosningar:

Allir flokkar finnast mér

framtakinu hrósa.

Það er verst að vandinn er

að velja rétt og kjósa.

 

Vorið:

Vinarmjúkur vefur blær

vorsins armi hæð og sund.

Ljúfa strengi landið slær

lífstin hörpu þýðri mund.

 

Átthagarnir:

Vestfirðingur að ég er

aldrei mun ég gleyma.

Allar stundir yljar mér

æskubyggðin heima.

 

Eurovision:

Engrar gleði olli mér

evróvíson þátturinn.

Margt er bjagað fram sem fer,

furðu galinn söngurinn.

 

Vegagerð:

Ég tel vegi Vestfjarða

vera í góðu lagi,

bæði um heiði og hálsana

hreint af besta tagi.

 

Burður:

Sumir bera sorg í hug,

svo og aðrir hetjudug.

Einir bera áhyggjur.

Upp má bera tillögur.

 

Sannlega er hann sauðburður,

svo og líka áburður,

oft hefst mikill atburður

eða bara viðburður.

Fleiri vísur vantar

Fékk ábendingu um að það vantaði hjá mér vísurnar eftir Bjargey, takk fyrir ábendinguna Heiða. Þegar ég fór svo betur yfir sá ég að mig vantar líka vísurnar hennar Magdalenu. Vona að ég geti bætt úr þessu sem fyrst. Ég setti allar vísurnar hér til hliðar á aðgengilegri stað undir Hagyrðingakvöld.

Vísurnar hans pabba

Ég var að skoða hjá mér gamlar færslur og sá að annað hvort hef ég aldrei sett vísurnar hans pabba inn eftir hagyrðingakvöldið eða eytt þeirri færslu einhverntíma. Ég bið ykkur og ekki síst pabba innilegrar afsökunar á þessu en hér koma þær þó seint sé.

Vísurnar eru eftir Guðjón Dalkvist Gunnarsson, Dalla, frá Gilsfjarðarmúla og síðar bónda í Mýrartungu I. Hann býr nú á Reykhólum og bruggar þar galdraseiði úr þangi sem nefnist Glæðir og fæst m.a. í Blómavali. Mjög gott á alls kyns plöntur 

 

Kosningarnar 2007.                                                          

 

B. Reyndi hann Jón að raka sig í framan;

    reyndar mætti húðin verða sólbrún.                          

    Rosalega þætti Geir það gaman  

    "Gæti hann orðið fallegri en Sólrún".                     

 

D. Geiri sínar gráu hristi,

    getur orðið hjón.  

    Ugla sat á sínum kvisti:

    Sólrúnu eða Jón?

 

S. Samfylkingin sofnuð er.

    Sígur fylgið meir.                                                         

    Vonar bara að bjargi sér                                 

    bónorðið frá Geir.

                                                                            

V. Vinstri græn á gremju þrífast, 

    gömlum púka eru lík.          .

    Öllu lofa, einskis svífast.

    Ömurleg sú pólitík.

 

Vegamálin.

Það er veigamikið mál,

að mæla sveig á vegum rétt.

Kennt við Teig er kjarr með sál.

Kunn er eigendanna frétt.

 

Aðeins sérð þú eyðisand,

auðnin skerðir manndóminn,

en er þú ferð um fagurt land

friðsæll verður hugur þinn.

 

Vorið.

Regnið lemur ræfilinn,

rennur úr nösum hor,

þeytuverk í þjóum finn.

Það er komið vor.

 

Er nú ekki mál að linni?

Ég ætlaði að gera gull

þótt gáfur þverri.

Þetta byrjaði sem bull

og botninn verri.

Ný bloggfærsla

Var skömmuð á ballinu okkar um helgina fyrir að blogga of lítið og viðurkenni ég fúslega að ég átti það skilið

Þessi bloggfærsla er því ætluð að fyrirbyggja að 5 mánuðir líði aftur á milli bloggfærslna.

Ef þið hafið eitthvað skemmtilegt efni sem þið viljið birta hér á síðunni, þá er ykkur velkomið að senda mér það á [e-mail], það verður að sjálfsögðu ritskoðað áður þannig að best er að skrifa eitthvað fallegt um mig

Það var frekar fámennt en einstaklega góðmennt á Bingóinu á laugardaginn og fullt af flottum vinningum fóru í góðar hendur. Sérstaklega var gaman að sjá krakkana sem mættu og sátu spennt yfir spjöldunum, takk fyrir komuna krakkar, vonast til að sjá ykkur aftur á næsta ári

Ef þið hafið tillögur að öðrum uppákomum, þá væri ægilega gaman að fá línu frá ykkur um þær eða jafnvel símtal, síminn minn er 8438808, allar hugmyndir vel þegnar.

Hlakka til að heyra frá ykkur

Bestu kveðjur

Jóhanna 

Bingó og ball

Þann 10. nóvember næstkomandi heldur Barðstrendingafélagið skemmtun í Breiðfirðingabúð, Faxafeni 14.

 

Byrjað verður á því að spila bingó kl. 20:30 og eru vinningarnir ekki af verri endanum!

 

Um kl. 23 munu Skógarpúkarnir taka völdin og fjörinu verður haldið uppi fram eftir nóttu. 

 

Miðaverð er aðeins 1500 krónur.  Miðinn gildir bæði á bingóið og ballið og fylgir eitt bingóspjald með hverjum miða.  Svo er hægt að kaupa spjöld eins og hver kýs.  Ef einhver hyggst mæta bara á ballið er það sama verð.

 

Notum nú tækifærið og fjölmennum.  Hvað er betra en að eyða laugardagskvöldi með fólki að vestan?

 

Endilega takið með ykkur gesti.

 

 

Á ballingu langar að leika

Og láta þá engu’ um það skeika

Að mæta í dáfínu dressi

Og dansa svo andann ég hressi

 

Vísurnar hennar Ólínu Kristínar

 

Kosningar:

Að lesa í regnbogans liti er snúið

og lausnin ei finnst fyrr en allt er loks búið.

Er það blár eða grænn eða brúnn eða rauður?

Er blessaður seðillinn best kominn auður?

 

Átthagar:

Í minni sveit var eintóm mold og væta

og mikið var ef sást þar sólarglæta.

Þar magnað var, sem undrun má víst sæta

en Mýrartunga alltaf mun mig kæta.

 

Eurovision:

Í landafundi lagðist áður hann

og lenti snemma á hinu græna landi.

Eiríkur er okkar rauði mann

í Evróvisjón lendir þó í strandi.

 

Vegagerð:

Víst er að vegagerðin

vekur hjá mörgum furðu.

Veita mun vesturferðin

vegfarendum snurðu.

 

Vorið:

Sagt er: Allt vænkist á vorin.

Og víst er að léttast mörg sporin

en sá geitungafjöld

sem grípur öll völd

getur stungið, þá öll von er borin.

 

Burður:

Vísnagáta:

Torskilið og tyrfið mas.

Tengingu á að lýsa.

Upp svo vaxi iðgrænt gras.

Illa samin vísa.

 

Eykur harma, eitrar geð.

Enga holu í vegi finn.

Hátt svo vælir, hinum með.

Hann er elsti sonur minn.

 

Afar dýrmætt, ekkert drasl.

Út úr vænum rollum datt.

Þrælavinna, þyngd og basl.

Það er ekki alveg satt.

Vísurnar hans Hjartar Þórarinssonar

 

Burður:

Ær og belja eru burðardýr,

í byrjun þetta nefni.

En bölvun valda burðardýr

sem bera fíkniefni.

 

Löngum taldist landburður

ef lifnaði fiskidráttur.

Flestir vita framburður

er fjalls og málfars háttur.

 

Áður fyrr var útburður

örþrifaráð hjá móður.

Annars er blaða útburður

almennt talinn góður.

 

Aðburður grenja er útkastið,

óburður varla herðir.

Áburður notast í andlitið

og áburður mannorð skerðir.

 

Viðburður úrtak af eindæmum,

atburður frásögn venjuleg.

Hrísburður eldföng í harðindum,

heyburð í eyjum þekki ég.

 

Burðarstoð er boðorðið

sem berst af þingmannsfundum

en burðarklárinn bjargaði

bændum mörgum stundum.

 

Burðargeta bróður þíns

oft breytist svo um munar.

Að létta byrðar bróður síns

er betra en nokkurn grunar.

 

Vonir manns mikils virðar,

vakna og fara á kreik.

Berum hvers annars byrðar,

bræður í hverjum leik.

 

Vorið:

Vetur dvínar, vorið hlær

veðrið hlýnar, þeyr á fjöllum.

Sólin skín og sunnanblær

sendi mínar kveðjur öllum.

 

Vegagerð:

Styrr er um Barðastrandarveg

á strandar jarðbrúninni.

Andstaðan  harla ótrúleg

og örmjó fjarðarmynni.

 

Ástar-Brandur átti staf,

engum var hann líkur.

Nú mun styttast norður af

að ná til Hólmavíkur.

 

Átthagarnir:

Hugur oft reikar, víst ég það veit,

oft vestur til Reykhólasveitar.

Á Miðhúsum geymi ég minningareit,

sú minning á hugann oft leitar.

 

Kosningarnar:

Þótt eldra fólki yfirleitt

þeir yngri vilji gleyma,

þá finnst nú hjá þeim eitt og eitt

atkvæði sem þeir geyma.

 

Eurovision:

Eurovision gort og grís,

gengur hrísl í kroppinn.

Hróður Íslands alveg vís

ef Eiki rís á toppinn.

Vísur frá Aðalheiði Hallgrímsdóttur

Kosningar: 

Kosningar nú koma í hlaðið

kappar mörgu sinna.

En eitt er víst, er upp er staðið

allir munu vinna.

 

Átthagarnir:

Átthögunum ann ég heitt

annars staðar gestur.

Þegar geð er grátt og leitt

er gott að hverfa vestur.

 

Þar mig faðma fjöllin há

firðir, eyjar, grundir

og hjá vinum uni þá

ótal glaðar stundir.

 

Eurovision:

Evróvisjón enn á ný,

við ekki erum sloppin.

Rauða hárið reddar því

við ryðjumst upp á toppinn.

 

Vegagerð fyrir vestan:

Vegakerfið vestra er

vægast sagt í molum

viðfangsefnið vænsta tel

að vinna bug á holum.

 

Vorið:

Alltaf vorið yndi bjó

þá ómar fuglaraustin

en fremra alltaf finnst mér þó

fagurt kvöld á haustin.

 

Burður:

Ber oft mikið báturinn,

bera kind og belja,

bera oft í bóli finn,

ber svo til að kvelja.

 

Ber sig eftir björginni,

ber á lyngi situr,

ber sig vel á brókinni,

mér ber að sýnast vitur.

 

Burðinn ýmsir baxa við

bæði kind og maður

ef það væri á aðra hlið

yrði margur glaður.

 

Til íbúa og brottfluttra Barðstrendinga

Niðurstaða nefndar um að efla atvinnulíf á Vestfjörðum liggur fyrir. Nú á að hefja markvissar aðgerðir til að flytja opinber störf til Vestfjarða og skapa ný störf. Áherslusvið í atvinnulífinu eru;

-         sjávarútvegur/matvælaframleiðsla/fiskeldi

-         ferðaþjónusta/ menningarverkefni/ gagnavinnsla

-         Rannsóknir/nýsköpun

 

Þróunarsetur Vestfjarða á Patreksfirði er í undirbúningi og tekur til starfa næsta vetur. Okkur vantar fagfólk og sérfræðinga á þessum sviðum á sunnanverða Vestfirði. Ef þú lesandi góður veist um fagfólk og sérfræðinga sem gætu hugsað sér að búa og starfa hjá okkur viljum við gjarnan vita af því. Allt kemur til greina og allt skoðað í trúnaði.

 

Vinsamlegast hafið samband við Jón Örn Pálsson, Atvinnuráðgjafa, Aðalgötu 5, 450 Patreksfirði. Sími: 456-2350   gsm: 892-1896   netfang: [e-mail]

 

Vísur frá Hallfríði Benediktsdóttur

Vegagerð:
Af því bráðum aka má
Arnkötludals heiði.
Von þeim gefst er vilja sjá
Vestfirðina í eyði.

Vorið:
Ég geng hér á gatslitnum skónum
og greina má vorið í tónum
það rignir með köflum
og rennur úr sköflum
og krónurnar koma undan snjónum.

Eurovision:
Það er mikil þjóðarheppni
og þónokkuð í okkur spunnið
við sendum lög í söngvakeppni
sem fráleitt er að geti unnið.

Átthagarnir:
Óx sem grein af ungri hríslu
uppeldið í réttum skorðum.
Í Steinadal í Strandasýslu
stóð mín ungbarnsvagga forðum.

Föðurleifðin faðm sinn breiddi
fól við barminn unga vífið
með ást og kærleik áfram leiddi
unglinginn í gegn um lífið.

Átthögunum aldrei gleymi
eins, þó víða liggi sporin
fallegustu fjöll í heimi
fönnum prýdd, en græn á vorin.

Kosningar:
Flokkarnir æða sem fífldjarfur her
flykkjast um bæi og sveitir.
En pælið þið í því sá púki er í mér
sem pólitískt viðrini heitir.

Velferðar kerfið í vonlausum hnút
virðist hjá flokkunum öllum
því langar mig mest til að leggjast bara út
og lifa sem þjófur á fjöllum.

Burður:
Sé ég oft um sauðburðinn
set á túnið áburðinn
vel mér besta viðburðinn
vernda og styrki frumburðinn.

Fer svo létt með framburðinn
færi á spjöldin atburðinn.
Hengi á klakka hestburðinn
hef í metum íburðinn.

Líst mér ekki á leirburðinn
ljótan tel ég rógburðinn
Ei má stunda útburðinn
utan þann með póstburðinn.